Gen 19 | WSK | STEP | Lot Sodom wonong ko kar lage kuringi dagiwaram se engel ilagala kote arataman. Se nungarkam ale barasam nongote namaram ale nomoke dugu te tararam, koma ali ningi kaparam,

Genesis 19

Sodom alo nunga kilek memek

1 Lot Sodom wonong ko kar lage kuringi dagiwaram se engel ilagala kote arataman. Se nungarkam ale barasam nongote namaram ale nomoke dugu te tararam, koma ali ningi kaparam, 2 ale balam, “Kari ilagala,” mam, “aninga kawam te tairalko. Ani nina ninga sangikko bagasam. Tairal ale nisiwik anuwal ale, turom agarak aga kawam te aniralko. Se tumong biyala barasanak asele nina aolak iluwal namaralko.”

Bare nuna balman, “Mena,” maman. “Ana turom imi am wonong kusumuri aninakko.”

3 Bare Lot am sail tagi lagaram se nuna ilak ko kawam te namaman. Asele Lot bread yeast mena mu kaiyam ale na yawara bo nungam ale nungaram se no gilingiman.

4 Se Lot ko kari ilagala mu me animan, am munaka se animan se Sodom kari, kulak te, garuk te taiman, Lot ko kawam taluru guruguman, 5 ale Lot aruman ale isarukasan, “Nika kari ilagala turom kerak bagomonko taiman mu apoko ya? Ilagala arungak aratu se ana awete nunga araganakko.”

6 Se Lot kota suwanta aratam ale songkuring baguram. 7 Ale balam, “O aga sikisaki,” mam, “munan memek sumu me beteralko!” mam. 8 “Aninga kuriang imet ilagala mu kari arungu saki me ani arigisan, am lilim bagasan. Umutang arungak aratik se nengeta aguwaya arungak beteralko mu beteralko. Bare kari ilagala imi aninga kari, se nina nungumik te kilek memek bo me beteralko. Nuna aninga kawam te agarak bagasan, se ani ninguru nunga bituekko.”

9 Bare nuna balman, “Ni kari awar tairem pa!” maman. “Ni anananga munan me tuterko! Anananga lage bitar ale tagi toko! Ana ka ilunak ninguru ka maguwunak bore ko. Ni me tagi to mu ana kari ilagala mu nunga maguwunak, ale ni ninguru nunguningkiri ka maguwunakkowo,” maman. Ale nuna Lot diruwuman se peleram, ale songkuring batagarmonko kaeyakasan.

10 Bare kari ilagala kawam ningi mu nuguting garukuman ale Lot tagiman ilak kawam ningi peleman ale songkuring baguman. 11 Ale nuna kari watingi bagaman, kulak te, garuk te, mu nomotam negeman se posaram. Se nuna kawam ko songkuring aringimonko me terong.

Lot Sodom beteram namaram

12 Se engel ilagala mu Lot manorman, “Nika saki ewela ago anisan agi - ka kuriang, ka neton ari, ka awiriya - mu suen la nunga gi ale arungak aratu ale wonong imi bitarko. 13 Ana wonong imi mituwunakko taiman. Kari Biya wonong ewere ko bagara memek arigam ikiam, ale ana mituwunakko balam se taiman.”

14 Se Lot nu Sodom kari ilagala noko nanawus ari nunga gimonko balman mu nongote namaram ale balam, “Nina tairate barasal ale wonong ewere beteralko,” mam. “Kari Biya wonong maguwurokko pingi aram,” mam. Bare nuna ilagala den mu ikiman bare den kolara ko balman.

15 Se ukira ago engel ilagala mu Lot manorman, “Tairate bares ale ka imet, ka kuriang pagar ilagala mu nunga gi ale sor imi beteral ale tagi talko! Wonong ewere ko kariimet memek biya tamonko bare nina ago tal bore ko!”

16 Bare Lot gomang ani se tairate me barasukaso. Bare Kari Biya Lot ko noman magaram se engel ilagala mu Lot se ko kuriang imet ago nuguting iluman ale arungak wonong mu ko buring ko arataman. 17 Asele engel bo balam, “Nina kueral bore ko naguralko!” mam. “Me nibiring ko loagaral, ale gomeng ningi me sanamaralko. Nagural duruk dopang te nama tarigiral mu asele nina me kueralkowo,” mam.

18 Bare Lot balam, “Kari biya, ani uwuta mu mesam. 19 Ni ani ago ko neman batagam se yawarakala aninga sangem. Bare duruk mu awar biya, se ani tairate te nama aratikko me terong. Ani ikisam wonong maguruk se ani lage luan te ago memek taikko agila? 20 Ni wonong gotek owore arikko. Mu pingi nuam, se ani te nama aratikko terong mam. Ni arigisam, mu wonong gotek. Ani mu te namirik ale me kuerikko.”

21 Se engel balam, “Mu terong. Wonong gotek mu ani me maguwurikko. 22 Aria! Naguralko! Ani mel bo me bitirik la nina nama wonong mu te aratalko.” Lot wonong mu ko balam wonong gotektir ma balam, se nuna wonong mu nup beteman Zoar maman. ^{▼▼Gen 19:22 Nup Zoar mu ko nunguning mu “gotektir”.}

Kari Biya wonong ilagala Sodom Gomorrah nunga moa mituwuram

23 Tom worem basu aratuwaram mu Lot Zoar ningi aratam. 24 Se Kari Biya balam se manga sulphur kani kani Sodom Gomorrah te kapaman ale wonong kaniman. 25 Kari Biya wonong ilagala umutang sor gomeng mu te animan mu maguwuram, ale ko kariimet nunga melmasak suen la ago nunga maguwu saparam, tam sirsir mel suen la ago kani saparam. 26 Se Lot ko nuwus mu buring ko loagaram ale manga ko geragam.

27 Ukiram tumong biyala Abraham kuwim Kari Biya nu ilak te sanamaram munakaram mu te peleram namaram. 28 Ale motam loagaram se gomeng Sodom Gomorrah te animan mu te nama kaparam ale tama bur aratuwaram se arigam, bare tama aromemek wore ko bur iwita arigam. 29 Kaem wonong ulengkala Lot te bagaram mu moa mituwuram, gomeng lilim maguwuram, bare nu Abraham ko ikia tam ale Lot gomang tuam ale saongam. ^{▼▼Gen 19:29 Den imitang ago arikko: Luke 17:28-32; 2 Peter 2:6-8; Jude 7.}

Lot se ko nanawus ari ilagala

30 Lot Zoar wonong te bagurukko nguangaram. Ale ko nanawus ari ilagala nunga giam ale arungak duruk te nama tarigiman ale manga gogong ningi bagakasan.

31 Se tom bo ko nanawus biya mu ko uria maonam, “Anananga ba garukaram,” mam. “Kari ito imi te ana arungak nanakko mena. 32 Buta se nanga ba yu tunak se nauk ale ninguru ngualuruk se ilak aninak ale kuriang ilunakko,” mam. 33 Se turom nuna ilagala nunga nonet waen tuman se nam ale ninguru ngualaram. Se ko nanawus biya tairam nuet ilak aniram. Bare nunga nonet waen ninguru ngualuwuram se ko nanawus mel mu ilak beteram mu nu me ko ikiam.

34 Aking ukiram se ko nanawus biya mu ko uria gotek mu maonam, “Ekalako ani ba ilak anirem. Se aitak turom imi mu aking waen tunak se nauk ngualuruk se ni ani beterem turan ilak anirko. Se nu te ni analak kuriang ilunakko.” 35 Se turom aking waen tuman se nam ngualaram, se ko nanawus gotek mu ilak aniram. Nu ninguru ngualaram, ale nu nanawus gotek mu aking ilak kilek beteram mu nu me ko ikiam.

36 Umutang te Lot ko nanawus ari ilagala mu nongota nunga nonet kumik te nutagu aratam. 37 Se biya mu kuriang kari iluwam ale ko nup Moab mam, mu nu Moab kariimet nunga girigir. 38 Se ko nanawus gotek mu kuriang kari iluwam tala, ale ko nup Bet-Ami mam. Bet-Ami mu Amon kariimet aitak am anisan wore nunga girigir.